बैठी जोवूं बाटड़ी विपदा विरह विशेष साजन बिन कुण साम्भल़े पीव बसे परदेस पाती में लिख मेलियो साजन ने संदेश आप बिना नहीं आवड़े पीव बसे परदेस आठूं पौहर औजको काया करे कलेस चैन आवे न चित्त में पीव बसे परदेस आवे ओल़ूं आपरी दिलड़ो घणो दुखेस अंसवन भीजी अँगीया पीव बसे परदेस सायधण सूनी सेज में मनमथ मार मरेस कल़पै कंचन कामिनी पीव बसे परदेस काग उडावै कालियौ सुगन विचारे शेष ड्योढ़ी बैठी डगमगै पीव बसे परदेस बण बैरण दे बादल़ी ठेठ काल़जे ठेस बिलखी ऊभी बारणै पीव बसे परदेस आज बरस मत आंगणे सुण इंदर संदेश मैं मर जावां मेंह में पीव बसे परदेस 🙏🏻🙏🏻 Heera Rathod🙏🏻🙏🏻 पीव बसे परदेश
