*गागालगालगागा गागालगालगागा* कशास आई देऊन जन्म मजला,कुढते कशास आई ? दिनरात्र नेत्र ओले,रडते कशास आई ? हाती तुझ्या न माझ्या,कन्या रुपात जगणे सांभाळण्या मला तू,डरते कशास आई ? मुलगी म्हणून मजला, झिडकारले कुणी जर दुःखात लाकडासम,जळते कशास आई ? स्त्री जन्म लाभणे हे,का ते तुझ्याच हाती ? करुनी जिवास कष्टी,ढळते कशास आई ? कर्तव्यदक्ष स्त्री तू,समजू नकोस अबला शब्दांत त्या जनांच्या,अडते कशास आई ? घेईन मी भरारी,गगनास पेलणारी कमजोर मग उगा तू,ठरते कशास आई ? जाणीव ह्या मनाला,साऱ्या तुझ्या ऋणांची होईन ढाल तेंव्हा,लढते कशास आई ? कमजोर बनवणारी, दुनिया असे विखारी लाथाड तू रुढींना,खचते कशास आई? *मीना पांचाळ* गझल