मोरा गांव ए बंधू चलबो अब हम गउंआ डगरिया, मत भरम | Marathi कविता

मोरा गांव ए बंधू चलबो अब हम गउंआ डगरिया, मत भरमाओ हमका। रोहिणी में बरसेला चानी अस बूंदवा, मृगशीषवा दमके दाह। आदरा में चमकेले नागिनी बिजूरिया, खेतवा में लहरेला धान। डरिया पर कुहूंके काली रे कोयलिया, बगिया में टपकेला आम। चल रे बटोहिया देखाईं तोंहे मोरा गांव, जहवां बसेला मोर प्रान। ए बंधू चलबो अब हम गउंआ डगरिया, मत भरमाओ हमका। जेठवा त धधकेला दिनवा दूपहरिया, छहरेला भरल आषाढ़। सवनवा लहरे लोग बाबा के दूअरिया, दूधवा चढ़ावेले अगाध। भादो में चम चम चमके रे बिजूरिया, कान्हा जनमे आधी रात। कुअरवा गमकेला माई के दूअरिया, होखेला घर घर जगरात। ए बंधू चलबो अब हम गउंआ डगरिया, मत भरमाओ हमका। खेतवा त पहिरेली धानी रे चुनरिया, नहरिया उठेले हिलोर। नीमिया के झूरु झूरु झूलेले पतइया, सूहूताले मजूर कठोर। महूअवा, इमीलिया, उख, अमरुधिया, बड़हर, कटहर, टिकोढ़। सूरुज बाबा लागे धन बा जवनियां, चांदनी बरसावेली इंजोर। ए बंधू चलबो अब हम गउंआ डगरिया, मत भरमाओ हमका। पीपरा पर पीहूकेला पीहू पीहू पपीहवा, बगिया नाचेला मन मोर। निरमल निरखेला शिवजी के पोखरवा, होखे जमात सांझ भोर। वहूरा तीज सखी सब झूलेली बगीचवा, निरखे श्याम चित चोर। चल ए सखी चली सब भृगुजी मंदिरवा, मनवा भइल बा विभोर। ए बंधू चलबो अब हम गउंआ डगरिया, मत भरमाओ हमका। ©Tarakeshwar Dubey मोरा गांव #WatchingSunset