दिसती अनेक रुपे भुकेची सभोवताली कुणा भाकरी तर कोणाला दौलत प्यारी हाव लागली आहे पैसा कमावण्याची इथल्या जगण्याची ही रीतच आहे न्यारी वणवण करतो तिचा जीव हो कामासाठी झोपडीत त्या माऊलीला करमत नाही काही दिडक्या पडती हाती कामानंतर तिच्या पिलांना अन्न पोटभर मिळतच नाही दुसरी माता टाकुन देते उरले सुरले तिची मुले ही नाही खातच भाजी पोळी रोज हवे असते त्यांना ते पिझ्झा बर्गर आहे बापाची पैशाने भरली झोळी दिसून येतो फरक कसा हा एका शहरी भूक कुणाला तर कोणाला अजीर्ण छळते मिळण्यासाठी अन्न दूरवरी एक चालतो तर दुसऱ्याची खूप चालुनी चरबी जळते शांत झोप लागू दे बाळा रे भगवंता पुसुन टाक तू या भूकेची कर्मकहाणी रिकाम पोटी निजावयाची नकोच सक्ती नको कुणा आईच्या देऊ डोळा पाणी ---२६/०३/२०२३ @२०।०० ©उमा जोशी #भूक #अनलज्वाला #(८/८/८)
